1it-bi-e-ma dGiš šú-na-tam i-pa-áš-šar
2iz-za-kàr-am a-na um-mi-šú
3um-mi i-na šá-at mu-ši-ti-ia
4šá-am-ḫa-ku-ma at-ta-na-al-la-ak
5i-na bi-ri-it it-lu-tim
6ib-ba-šú-nim-ma ka-ka-bu šá-ma-i
7[ki]-iṣ-رù šá A-nim im-ḳu-ut a-na ṣi-ri-ia
8áš-ši-šú-ma ik-ta-bi-it e-li-ia
9ú-ni-iš-šú-ma nu-uš-šá-šú ú-ul il-ti-’i
10Urukki ma-tum pa-ḫi-ir e-li-šú
11it-lu-tum ú-na-šá-ku ši-pi-šú
12ú-um-mi-id-ma pu-ti
13i-mi-du ia-ti
14áš-ši-a-šú-ma ab-ba-la-áš-šú a-na ṣi-ri-ki
15um-mi dGiš mu-di-a-at ka-la-ma
16iz-za-kàr-am a-na dGiš
17mi-in-di dGiš šá ki-ma ka-ti
18i-na ṣi-ri i-wa-li-id-ma
19ú-ra-ab-bi-šú šá-du-ú
20ta-mar-šú-ma [kima Sal(?)] ta-ḫa-du at-ta
21it-lu-tum ú-na-šá-ku ši-pi-šú
22tí-iṭ-ṭi-ra-áš-[šú tu-ut]-tu-ú-ma
23ta-tar-ra-[as-su] a-na ṣi-[ri]-ia
24[uš]-ti-nim-ma i-ta-mar šá-ni-tam[63]
25[šú-na]-ta i-ta-wa-a-am a-na um-mi-šú
26[um-mi] a-ta-mar šá-ni-tam
27[šú-na-tu a-ta]-mar e-mi-a i-na su-ḳi-im
28[šá Uruk]ki ri-bi-tim
29ḫa-aṣ-ṣi-nu na-di-i-ma
30e-li-šú pa-aḫ-ru
31ḫa-aṣ-ṣi-nu-um-ma šá-ni bu-nu-šú
32a-mur-šú-ma aḫ-ta-du a-na-ku
33a-ra-am-šú-ma ki-ma áš-šá-tim
34a-ḫa-ab-bu-ub el-šú
35el-ki-šú-ma áš-ta-ka-an-šú
36a-na a-ḫi-ia
37um-mi dGiš mu-da-at [ka]-la-ma
38[iz-za-kàr-am a-na dGiš]
39[dGiš šá ta-mu-ru amêlu]
40[ta-ḫa-ab-bu-ub ki-ma áš-šá-tim el-šú]
41áš-sum uš-[ta]-ma-ḫa-ru it-ti-ka
42dGiš šú-na-tam i-pa-šar
43dEn-ki-[dũ wa]-ši-ib ma-ḫar ḫa-ri-im-tim
44ur-[šá ir]-ḫa-mu di-da-šá(?) ip-tí-[e]
45[dEn-ki]-dũ im-ta-ši a-šar i-wa-al-du
46ûm, 6 ù 7 mu-ši-a-tim
47dEn-[ki-dũ] ti-bi-i-ma
48šá-[am-ka-ta] ir-ḫi
49ḫa-[ri-im-tum pa-a]-šá i-pu-šá-am-ma
50iz-za-[kàr-am] a-na dEn-ki-dũ
51a-na-tal-ka dEn-ki-dũ ki-ma ili ta-ba-áš-ši
52am-mi-nim it-ti na-ma-áš-te-e
53ta-at-ta-[na-al]-ak ṣi-ra-am[64]
54al-kam lu-úr-di-ka
55a-na libbi [Urukki] ri-bi-tim
56a-na bît [el]-lim mu-šá-bi šá A-nim
57dEn-ki-dũ ti-bi lu-ru-ka
58a-na Ê-[an]-na mu-šá-bi šá A-nim
59a-šar [dGiš gi]-it-ma-[lu] ne-pi-ši-tim
60ù at-[ta] ki-[ma Sal ta-ḫa]-bu-[ub]-šú
61ta-[ra-am-šú ki-ma] ra-ma-an-ka
62al-ka ti-ba i-[na] ga-ag-ga-ri
63ma-a-ag-ri-i-im
64iš-me a-wa-as-sa im-ta-ḫar ga-ba-šá
65mi-il-[kum] šá aššatim
66im-ta-ḳu-ut a-na libbi-šú
67iš-ḫu-ut li-ib-šá-am
68iš-ti-nam ú-la-ab-bi-iš-sú
69li-ib-[šá-am] šá-ni-a-am
70ši-i it-ta-al-ba-áš
71ṣa-ab-tat ga-as-su
72ki-ma [ili] i-ri-id-di-šú
73a-na gu-up-ri šá-ri-i-im
74a-šar tar-ba-ṣi-im
75i-na [áš]-ri-šú [im]-ḫu-ruri-ia-ú
76[ù šú-u dEn-ki-dũ i-lit-ta-šú šá-du-um-ma]
77[it-ti ṣabâti-ma ik-ka-la šam-ma]
78[it-ti bu-lim maš-ḳa-a i-šat-ti]
79[it-ti na-ma-áš-te-e mê i-ṭab lib-ba-šú]
81ši-iz-ba šá na-ma-áš-te-e
82i-te-en-ni-ik
83a-ka-lam iš-ku-nu ma-ḫar-šú
84ib-tí-ik-ma i-na-at-tal
85ù ip-pa-al-la-as[65]
86ú-ul i-di dEn-ki-dũ
87aklam a-na a-ka-lim
88šikaram a-na šá-te-e-im
89la-a lum-mu-ud
90ḫa-ri-im-tum pi-šá i-pu-šá-am-ma
91iz-za-kàr-am a-na dEn-ki-dũ
92a-ku-ul ak-lam dEn-ki-dũ
93zi-ma-at ba-la-ṭi-im
94šikaram ši-ti ši-im-ti ma-ti
95i-ku-ul a-ak-lam dEn-ki-dũ
96a-di ši-bi-e-šú
97šikaram iš-ti-a-am
987 aṣ-ṣa-am-mi-im
99it-tap-šar kab-ta-tum i-na-an-gu
100i-li-iṣ libba-šú-ma
101pa-nu-šú [it]-tam-ru
102ul-tap-pi-it [lùŠÚ]-I
103šú-ḫu-ra-am pa-ga-ar-šú
104šá-am-nam ip-ta-šá-áš-ma
105a-we-li-iš i-we
106il-ba-áš li-ib-šá-am
107ki-ma mu-ti i-ba-áš-ši
108il-ki ka-ak-ka-šú
109la-bi ú-gi-ir-ri
110uš-sa-ak-pu re’ûti mu-ši-a-tim
111ut-tap-pi-iš šib-ba-ri
112la-bi uk-ta-ši-id
113it-ti-[lu] na-ki-[di-e] ra-bu-tum
114dEn-ki-dũ ma-aṣ-ṣa-ar-šú-nu
115a-we-lum giš-ru-um
116iš-te-en it-lum
117a-na [na-ki-di-e(?) i]-za-ak-ki-ir
131i-ip-pu-uš ul-ṣa-am
132iš-ši-ma i-ni-i-šú
133i-ta-mar a-we-lam[66]
134iz-za-kàr-am a-na ḫarimtim
135šá-am-ka-at uk-ki-ši a-we-lam
136a-na mi-nim il-li-kam
137zi-ki-ir-šú lu-uš-šú
138ḫa-ri-im-tum iš-ta-si a-we-lam
139i-ba-uš-su-um-ma i-ta-mar-šú
140e-di-il e-eš ta-ḫi-[il-la]-am
141lim-nu a-la-ku ma-na-aḫ-[ti]-ka
142e-pi-šú i-pu-šá-am-ma
143iz-za-kàr-am a-na dEn-[ki-dũ]
144bi-ti-iš e-mu-tim ik ……
145ši-ma-a-at ni-ši-i-ma
146tu-a-(?)-ar e-lu-tim
147a-na âli(?) dup-šak-ki-i e-ṣi-en
148uk-la-at âli(?) e-mi-sa a-a-ḫa-tim
149a-na šarri šá Urukki ri-bi-tim
150pi-ti pu-uk epiši(-ši) a-na ḫa-a-a-ri
151a-na dGiš šarri šá Urukki ri-bi-tim
152pi-ti pu-uk epiši(-ši)
153a-na ḫa-a-a-ri
154áš-ša-at ši-ma-tim i-ra-aḫ-ḫi
155šú-ú pa-na-nu-um-ma
156mu-uk wa-ar-ka-nu
157i-na mi-il-ki šá ili ga-bi-ma
158i-na bi-ti-iḳ a-bu-un-na-ti-šú
159ši-ma-as-su
160a-na zi-ik-ri it-li-im
161i-ri-ku pa-nu-šú
171i-il-la-ak [dEn-ki-dũ i-na pa-ni]
172u-šá-am-ka-at [wa]-ar-ki-šú
173i-ru-ub-ma a-na libbi Urukki ri-bi-tim
174ip-ḫur um-ma-nu-um i-na ṣi-ri-šú
175iz-zi-za-am-ma i-na su-ḳi-im
176šá Urukki ri-bi-tim
177pa-ḫra-a-ma ni-šú
178i-ta-wa-a i-na ṣi-ri-šú
179a-na ṣalam dGiš ma-ši-il pi-it-tam
180la-nam šá-pi-il
181si-ma …. [šá-ki-i pu]-uk-ku-ul
182............. i-pa-ka-du
183i-[na mâti da-an e-mu]-ki i-wa
184ši-iz-ba šá na-ma-aš-te-e
185i-te-en-ni-ik
186ka-a-a-na i-na [libbi] Urukki kak-ki-a-tum
187it-lu-tum ú-te-el-li-lu
188šá-ki-in ur-šá-nu
189a-na itli šá i-šá-ru zi-mu-šú
190a-na dGiš ki-ma i-li-im
191šá-ki-iš-šum me-iḫ-rù
192a-na dIš-ḫa-ra ma-a-a-lum
193na-di-i-ma
194dGiš it-[ti-il-ma wa-ar-ka-tim]
195i-na mu-ši in-ni-[ib-bi]-it
196i-na-ag-šá-am-ma
197it-ta-[zi-iz dEn-ki-dũ] i-na sûḳim
198ip-ta-ra-[aṣ a-la]-ak-tam
199šá dGiš
200[a-na e-pi-iš] da-na-ni-iš-šú
208šar(?)-ḫa
209dGiš …
210i-na ṣi-ri-[šú il-li-ka-am dEn-ki-dũ]
211i-ḫa-an-ni-ib [pi-ir-ta-šú]
212it-bi-ma [il-li-ik]
213a-na pa-ni-šú
214it-tam-ḫa-ru i-na ri-bi-tum ma-ti
215dEn-ki-dũ ba-ba-am ip-ta-ri-ik
216i-na ši-pi-šú
217dGiš e-ri-ba-am ú-ul id-di-in
218iṣ-ṣa-ab-tu-ma ki-ma li-i-im
219i-lu-du
220zi-ip-pa-am ’i-bu-tu
221i-ga-rum ir-tu-tu
222dGiš ù dEn-ki-dũ
223iṣ-ṣa-ab-tu-ú-ma
224ki-ma li-i-im i-lu-du
225zi-ip-pa-am ’i-bu-tu
226i-ga-rum ir-tu-tú
227ik-mi-is-ma dGiš
228i-na ga-ag-ga-ri ši-ip-šú
229ip-ši-iḫ uz-za-šú-ma
230i-ni-iḫ i-ra-as-su
231iš-tu i-ra-su i-ni-ḫu
232dEn-ki-dũ a-na šá-ši-im
233iz-za-kàr-am a-na dGiš
234ki-ma iš-te-en-ma um-ma-ka
235ú-li-id-ka
236ri-im-tum šá su-pu-ri
237dNin-sun-na
238ul-lu e-li mu-ti ri-eš-ka
239šar-ru-tú šá ni-ši
240i-ši-im-kum dEn-lil
241 duppu 2 kam-ma
242shú-tu-ur e-li …………………
243 4 šú-ši
